ចិន៖ ការរាតត្បាតនៃជំងឺគ្រុនផ្តាសាយនៅក្នុងតំបន់រដ្ឋបាលពិសេសរបស់ទីក្រុងហុងកុង បានសម្លាប់មនុស្សចំនួន៣២០នាក់ហើយ ខណៈដែលតួលេខនេះត្រូវបានគេអះអាងថា គឺខ្ពស់ជាងឆ្នាំមុន ហើយរហូតមកទល់ពេលនេះ ករណីជំងឺគ្រុនផ្តាសាយនេះ មានចំនួន៤៥៦ករណីហើយ
ក្នុងនោះជនរងគ្រោះភាគច្រើនគឺជាមនុស្សចាស់ដែលមានអាយុលើសពី៦៥ឆ្នាំ នេះបើតាមការដឹងពីក្រសួងសុខាភិបាលទីក្រុងហុងកុង។
ប្រភពបញ្ជាក់ថា ចាប់តាំងពីថ្ងៃទី៥ ឧសភា មកដល់ថ្ងៃទី៦ សីហា កុមារចំនួន១៩នាក់ ត្រូវបានរកឃើញថាបានឆ្លងជំងឺគ្រុនផ្តាសាយនេះ ដោយក្នុងនោះ៣នាក់បានបាត់បង់ជីវិត។
យោងតាមទិន្នន័យដែលបានមកពីក្រសួងសុខាភិបាលទីក្រុងហុងកុង ចំនួនករណីជំងឺគ្រុនផ្តាសាយនេះ បានកើនឡើងខ្ពស់បំផុតកាលពីពាក់កណ្តាលខែកក្កដា ប៉ុន្តែថយចុះវិញនៅក្នុងរយៈពេល៣សប្តាហ៍ចុងក្រោយនេះ៕
