អាជ្ញាធរឥណ្ឌូណេស៊ីបានអះអាងថា ក្រុមជនសង្ស័យឆ្លើយឆ្លងជាមួយជនរងគ្រោះ តាមរយៈទូរស័ព្ទ ដោយប្រាប់ពីអំពើល្មើសច្បាប់ដែលជនរងគ្រោះបានប្រព្រឹត្ត ហើយបើសិនជាពួកគេចង់បិទបាំងអំពើល្មើសច្បាប់របស់ខ្លួន ពួកគេត្រូវតែបង់ប្រាក់ឲ្យជនសង្ស័យទាំងនេះ។
នគរបាលឥណ្ឌូណេស៊ីបញ្ជាក់ថា ក្នុងចំណោមជនសង្ស័យ១៥៣នាក់ មានជនជាតិចិន ១៤៨នាក់ រីឯ៥នាក់ទៀតជាជនជាតិឥណ្ឌូណេស៊ី រីឯជនសង្ស័យទាំងនោះ ត្រូវនគរបាលឥណ្ឌូណេស៊ីចាប់ខ្លួន ក្នុងពេលមានការបង្ក្រាបទ្រង់ទ្រាយធំនៅក្រុង Surabaya រួមទាំងកោះ Batam និងBali ផងដែរ។
អ្នកនាំពាក្យប៉ូលិសឥណ្ឌូណេស៊ីលោក Argo Yuwono បានថ្លែងក្នុងសន្និសីទកាសែតថា នេះជារឿងក្ដីបោកប្រាស់តាមទូរស័ព្ទ ហើយព័ត៌មាននេះយើងទទួលបានពីទីភ្នាក់ងារនគរបាលចិន ដូច្នេះហើយនេះជាការស្រាវជ្រាវរួមរវាងនគរបាលឥណ្ឌូណេស៊ី និងចិន។
លោកYuwono បានពន្យល់បន្ថែមទៀតថា អ្នកឆបោកជាជនជាតិចិន អ្នករងគ្រោះក៏ជាជនជាតិចិនដែរ គ្រាន់តែជនសង្ស័យឆបោកតាមរយៈប្រព័ន្ធទូរស័ព្ទនេះ ធ្វើសកម្មភាពនៅឥណ្ឌូណេស៊ីតែប៉ុណ្ណោះ។ ជនរងគ្រោះទាំងអស់សុទ្ធតែជាមន្ត្រីជាន់ខ្ពស់ និងអ្នកជំនួញមានទ្រព្យស្ដុកស្ដម្ភចិន ហើយចាប់តាំងពីដើមឆ្នាំមក ជនសង្ស័យបោកបានប្រាក់ចំនួន ៤៥០លានដុល្លារឯណោះ។
ជនសង្ស័យក្លែងបន្លំខ្លួនជាមន្ត្រីអគ្គរដ្ឋអាជ្ញា ឬនគរបាល ហើយបានទូរស័ព្ទប្រាប់ទៅជនរងគ្រោះ ពីអំពើល្មើសច្បាប់ពួកគេបានប្រព្រឹត្ត ប៉ុន្តែពួកគេប្រាប់ថា រឿងក្ដីនេះអាចចចារគ្នាបាន បើសិនជាជនរងគ្រោះបង់ប្រាក់ឲ្យនោះ។
គួរបញ្ជាក់ដែរថា ជនសង្ស័យជនជាតិចិនទាំងនេះ ឆ្លងដែនចូលឥណ្ឌូណេស៊ីដោយប្រើប្រាស់ទិដ្ឋាការជាអ្នកទេសចរ ហើយជនសង្ស័យមួយចំនួនធំ នឹងត្រូវប្រគល់ទៅឲ្យក្រសួងអន្តោប្រវេសន៍ ហើយពួកគេក៏ប្រហែលជានឹងត្រូវគេបញ្ជូនទៅស្រុកកំណើតវិញ៕
