លោក ឡុង ឌីម៉ង់ បានបញ្ជាក់ឲ្យដឹងថា កិច្ចប្រជុំនោះបានសម្រេចនូវបញ្ហាបីចំណុចគឺ៖ ១-ក្រសួងរៀបចំដែនដីនឹងចេញលិខិតផ្អាកសំណង់ និងឲ្យរុះរើ។ ២-ក្រុមជាងក្រុមហ៊ុន ចាប់ផ្តើមរុះរើដោយខ្លួនឯងចាប់ពីថ្ងៃសុក្រនេះ គឺរុះដំបូលមុខ ពុទ្ធសាសនបណ្ឌិតជាមុន ។ ៣-ចាត់មន្ត្រីជំនាញ ប្រចាំការជំរុញដំណើរការនេះរហូតដល់ទីបញ្ចប់។
គួរបញ្ចាក់ថា ចំណាត់ការចំពោះសំណង់ក្រុមហ៊ុន NAGA Worldនេះ បានធ្វើឡើងភ្លាមៗក្រោយពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានណែនាំឲ្យអាជ្ញាធរ មានសមត្ថកិច្ច និងជំនាញពាក់ព័ន្ធទាំងអស់ ឲ្យពិភាក្សា និងមានវិធានការកែលម្អវិញជាបន្ទាន់ នូវសំណង់អគាររបស់ក្រុមហ៊ុន NAGA World ដែលបានសាងសង់ប៉ះពាល់ ដល់សោភ័ណភាពរាជធានី ដើម្បីធ្វើយ៉ាងណា ឲ្យរក្សាបាននូវលំហសាធារណៈ សម្រាប់ប្រជាពលរដ្ឋមកលម្ហែកំសាន្តនៅសួនសម្តេចហ៊ុន សែន ឲ្យដូចដើម បន្ទាប់ពីសម្តេចបញ្ចប់ពិធីសម្ពោធគម្រោងការពារទឹកជំនន់ជំហាន៣ របស់ JICA កាលពីព្រឹកថ្ងៃទី៥ ខែវិច្ឆិកានេះ៕
