ក្នុងសន្និសីទសហប្រតិបត្តិការកម្ពុជា-បារាំង លើការអភិវឌ្ឍសេដ្ឋកិច្ច និងទេសចរណ៍ ត្រូវបានរៀបចំឡើងកាលពីពេលថ្មីៗនេះ នៅទីក្រុងលីយ៉ុង ប្រទេសបារាំង ដោយមានការចូលរួមពី លោក ទ្រី ឈីវ អគ្គនាយករងទេសចរណ៍ និងឯកឧត្តម Jean Claude Poimboeuf អគ្គរដ្ឋទូតបារាំងប្រចាំកម្ពុជា, កុងស៊ុលកិត្តិយសកម្ពុជាប្រចាំទីក្រុងលីយ៉ុង និងមានការចូលរួមពីអ្នកវិនិយោគបារាំង ក្នុងវិស័យទេសចរណ៍ និងអាជ្ញាធរបារាំងប្រមាណជាង១០០នាក់។
លោក ទ្រី ឈីវ តំណាងក្រសួងទេសចរណ៍ បានបង្ហាញអំពីសក្តានុពល និងភាពទាក់ទាញទេសចរ នៅកម្ពុជា ផែនការយុទ្ធសាស្ត្រអភិវឌ្ឍទេសចរណ៍ និងកាលានុវត្តភាព នៃការវិនិយោគ ក្នុងវិស័យទេសចរណ៍ នៅកម្ពុជា។ លោកបញ្ជាក់ថា បារាំងជាទីផ្សារ ដ៏មានសក្តានុពល សម្រាប់វិស័យទេសចរណ៍កម្ពុជា ហើយរហូតមកដល់បច្ចុប្បន្ន ចំនួនទេសចរបារាំងមកមានចំនួនកាន់តែច្រើន ស្ថិតក្នុងចំណោមទីផ្សារធំៗ ទាំង១០ របស់កម្ពុជាផងដែរ។
ចំណែកការវិនិយោគរបស់បារាំង ក្នុងវិស័យទេសចរណ៍កម្ពុជា រួមមាន ផ្នែកសណ្ឋាគារ ផ្ទះសំណាក់ ភោជនីយដ្ឋាន ទីភ្នាក់ងារទេសចរណ៍ និងសេវាកម្មទេសចរណ៍ជាច្រើនទៀត។
សូមរំឭកថា បច្ចុប្បន្នក្រសួងទេសចរណ៍ បាននឹងកំពុងយកចិត្តទុកដាក់ រៀបចំគោលនយោបាយ ទាក់ទាញទេសចរបារាំងចូលនិវត្តន៍មកកម្ពុជា៕ AKP
