អធិការនគរបាលស្រុកស្អាង លោកវរសេនីយ៍ទោ សេង សុជាតិ បានឲ្យដឹងថា ជនសង្ស័យទី១-ឈ្មោះ ម៉ុង សុងហេង ហៅខ្លា ភេទប្រុស អាយុ ២៩ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅភូមិ ព្រែករុន ឃុំព្រែកគយ ស្រុកស្អាង, ទី២-ឈ្មោះ ជឺ លីម ភេទប្រុស អាយុ៣៥ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅភូមិត្រើយត្រឹង្ស ឃុំព្រែកអំបិល ស្រុកស្អាង បច្ចុប្បន្នស្នាក់នៅភូមិក្នុងព្រែក ឃុំព្រែកគយ ស្រុកស្អាង និងទី៣-ឈ្មោះ ញ៉ លីហូវ ភេទប្រុស អាយុ ៤១ឆ្នាំ ជនជាតិខ្មែរ មុខរបរកសិករ មានទីលំនៅភូមិព្រែកតាវ៉ា ឃុំទឹកវិល ស្រុកស្អាង។
លោកវរសេនីយ៍ទោ សេង សុជាតិ បានឲ្យដឹងថា វត្ថុតាងដែលដកហូតរួមមាន ថ្នាំញៀនប្រភេទមេតំហ្វេតាមីន ហៅម៉ាទឹកកកចំនួន ១កញ្ចប់ ម៉ូតូ ១គ្រឿងម៉ាក YAMAHA XT (mini) ពណ៌ខៀវលាយស គ្មានស្លាកលេខ កាបូបដៃពណ៌ខ្មៅ ចំនួន១ មានប្រាក់ ៦០,០០០រៀល និងសម្ភារសម្រាប់ជកគ្រឿងញៀនមួយចំនួន។
លោកអធិការបានបញ្ជាក់ថា បន្ទាប់ពីទទួលព័ត៌មានសង្ស័យថា នៅលើផ្ទះជនសង្ស័ឈ្មោះ ម៉ុង សុខហេង ហៅខា មានជនសង្ស័យផ្សេងទៀតសម្ងំចែកចាយ និងប្រើប្រាស់គ្រឿងញៀនរួចមក លោកបានសុំគោលការណ៍ពីលោកឧត្តមសេនីយ៍ទោ អ៊ាវ ចំរើន ស្នងការនគរបាលខេត្តកណ្តាល និងសុំការឯកភាពពីលោក លឹម សុគន្ថា ព្រះរាជអាជ្ញាអមសាលាដំបូងខេត្តកណ្តាល ចុះឡោមព័ន្ធឆែកឆេរលំនៅឋានជនសង្ស័យឈានដល់រកឃើញវត្ថុតាងជាក់ស្តែង ឃាត់ខ្លួនជនសង្ស័យទាំង៣នាក់ ដែលមានវត្តមាននៅលើផ្ទះ ដើម្បីកសាងសំណុំរឿងចាត់ការតាមច្បាប់ ៕
