សមត្ថកិច្ចមូលដ្ឋានបានឲ្យដឹងថា ហេតុការណ៍នេះ បានកើតឡើង នៅរសៀលថ្ងៃទី៦ ខែវិច្ឆិកា ឆ្នាំ២០១៥ នៅចំណុចក្រោមផ្ទះម្តាយរបស់ជនរងគ្រោះ នៅភូមិព្រែកពោធិ៍ លើឃុំព្រែកពោធិ៍ ស្រុកស្រីសន្ធរ ខេត្តកំពង់ចាម។
លោក ខេង ស្រេង អធិការស្រុកស្រីសន្ធរ បានឲ្យដឹងថា បុរសជាប្តីខាងលើមានឈ្មោះ ធឿន គឹមថេង អាយុ ៣១ឆ្នាំ ចំណែកប្រពន្ធរងគ្រោះ ឈ្មោះ ស្រី ណុច អាយុ ៣៨ឆ្នាំ មានផ្ទៃពោះ៨ខែ ១៥ថ្ងៃ ហើយត្រូវប្តីទាញពូថៅកាប់ចំបំពង់ក បណ្តាលឲ្យស្លាប់ភ្លាមនៅនឹងកន្លែងកើតហេតុ។ ក្រោយធ្វើសកម្មភាពកាប់សម្លាប់ប្រពន្ធរួច បុរសជាប្តីបានយកខ្សែអង្រឹងទៅចងក បណ្តាលឲ្យស្លាប់ដូចគ្នា ។
លោកអធិការបានបញ្ជាក់ថា មូលហេតុនាំឲ្យកើតនូវអំពើហិង្សានេះ ដោយសារជម្លោះក្នុងគ្រួសារ ប៉ុន្តែលោកមិនបានបញ្ជាក់ថា ផ្តើមឡើងដោយសារមូលហេតុអ្វីឲ្យពិតប្រកដនោះទេ ៕
