តែមកដល់ពេលនេះ គេនៅតែឃើញប្រជាពលរដ្ឋការរិះគន់ទាក់ទងទៅនឹងភាពឥតសណ្តាប់ធ្នាប់ គឺការយកចិញ្ចើមថ្នល់លក់ដូររញែរញៃនៅតែដដែល ខណៈការិយាល័យសណ្តាប់ធ្នាប់សាធារណៈមិនព្រមរៀបចំ ហើយបើរៀបចំវិញ គឺធ្វើបាន១ទៅ២ថ្ងៃនៅពេលទូរទស្សន៍ផ្សាយតែប៉ុណ្ណោះ ហើយក៍គេងលក់ទៅវិញដដែល។
គួរបញ្ជាក់ថានៅក្នុងកិច្ចប្រជុំផ្សព្វផ្សាយនៃការរៀបចំសណ្តាប់ធ្នាប់ ឯកឧត្តម ឈួរ ច័ន្ទឌឿន អភិបាលខេត្តកំពង់ឆ្នាំងបានថ្លែងព្រមានខ្លាំងៗដល់សមត្ថកិច្ច និងមន្ត្រីរាជការគ្រប់រូបអំពីសកម្មភាពការងាររបស់ខ្លួន កុំអោយអសកម្ម កុំធ្វើជាមន្ត្រីដែលចេះតែពាក់ស្បែកជើងប៊ូល្អៗ និងតឺនុយខោអាវស្អាត មកកន្លែងធ្វើការបានតែមួយភ្លែត តែការងារវិញមិនព្រមធ្វើ បើកតែប្រាក់ខែ។ជាពិសេសទៅទៀតនោះ ឯកឧត្តម បានព្រមានដកនាយការិយាល័យនគរបាលសណ្តាប់ធ្នាប់ចេញ ប្រសិនបើមិនមានសមត្ថភាពធ្វើការនោះទេ កុំទុកអោយប្រជាពលរដ្ឋរិះគន់ដល់មន្ត្រីផ្សេងៗទៀតដែលគេកំពុងខិតខំធ្វើការ។
ដោយឡែកលោកឧត្តមសេនីយត្រី ប្រាក់ វុទ្ធី ស្នងការនគរបាលខេត្តកំពង់ឆ្នាំង បានឲ្យដឹងថា ចំពោះការអសកម្មរបស់នាយការិយាល័យនគរបាលសណ្តាប់ធ្នាប់លោកបានដឹង ហើយកំពុងណែនាំគាត់ តែប្រសិនបើគាត់នៅតែអសកម្មទៀត ស្នងការនគរបាលខេត្ត និងអនុវត្តទៅតាមច្បាប់ ដោយមិនត្រូវអោយមានមន្ត្រីអសកម្មណាមួយ នៅក្នុងស្នងការដ្ឋាននគរបាលខេត្តឡើយ។
ចំពោះលោក មាស ម៉េងហួត នាយការិយាល័យនគរបាលសណ្តាប់ធ្នាប់វិញ អ្នកយកព័ត៌មានយើងព្យាយាមសុំការបំភ្លឺពីលោក តែមិនអាចទំនាក់ទំនងសុំការបំភ្លឺបានទេ ព្រោះទូរស័ព្ទលោក ទូរស័ព្ទចូល តែគ្មានអ្នកទទួល៕
