លោកវរសេនីយ៍ត្រី ភឿង ម៉ាន់សឹង្ហ នាយការិយាល័យនគរបាលព្រហ្មទណ្ឌកម្រិតធ្ងន់ បានឲ្យដឹងថា ជនសង្ស័យទាំង៣នាក់ ដែលត្រូវចាប់ឃាត់ខ្លួនពីបទកំហែងយកទី១.ឈ្មោះ លីវ តាំងហូរ ភេទប្រុស អាយុ ២៦ឆ្នាំ រស់នៅភូមិគោរដ្ឋាន ឃុំអូរអំបិល ក្រុងសិរីសោភ័ណ ខេត្តបន្ទាយមានជ័យ, ទី២.ឈ្មោះ ពេជ្រ ចាន្ត្រា ភេទប្រុស អាយុ ២៨ឆ្នាំ រស់នៅភូមិ៣ សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ និងទី៣.ឈ្មោះ ផល សីហា ភេទប្រុស អាយុ ២៨ឆ្នាំ រស់នៅភូមិព្រះពន្លា សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ ។
លោកវរសេនីយ៍ឯក សិទ្ធិ ឡោះ ស្នងការរង ទទួលបន្ទុកការិយាល័យកណ្តាលនគរបាលព្រហ្មទណ្ឌ បានឲ្យដឹងផងដែរថា កាលពីវេលាម៉ោង២រសៀល ថ្ងៃទី២២ ខែតុលា ឆ្នាំ២០១៥ កន្លងមកនេះ កើតមានករណីកំហែងយកមួយ ដែលផ្តើមចេញពីអ្នករត់តាក់ស៊ីចំនួន៣នាក់ បានជំរិតយកលុយពីអ្នកជិះរថយន្តតាក់ស៊ីរបស់គេ ដែលមានជនរងគ្រោះម្នាក់ឈ្មោះ ព្រំ ភ័ក្រ ភេទប្រុស អាយុ ៣៥ឆ្នាំ រស់នៅភូមិស្វាយពក ឃុំដូង ស្រុករមាសហែក ខេត្តស្វាយរៀង មកពីធ្វើការនៅប្រទេសថៃ ។ ជនរងគ្រោះជិះរថយន្តតាក់ស៊ី ដែលមានម្ចាស់រថយន្តចំនួន ២នាក់ ឈ្មោះ ផល សីហា ជាអ្នកបើកបរ និងម្នាក់ទៀតឈ្មោះ លីវ តាំងហូរ ដែលត្រូវជាប្អូនថ្លៃនោះជាព្រូរថយន្ត ចំណែកឈ្មោះ ពេជ្រ ចាន្ត្រា ជាអ្នកសមគំនិត។ ក្នុងរថយន្តនោះ គឺមានតែជនរងគ្រោះម្នាក់ឯង មកពីថៃដល់ប៉ោយប៉ែត ខ្លួនបានជិះរថយន្តតាក់ស៊ីនោះ ក្នុងតម្លៃ ៨០០បាត ទៅដល់ភ្នំពេញ ពេលមកដល់ចំណុចស្ពានតាផាន់ ក្នុងភូមិក្បាលស្ពាន សង្កាត់ព្រះពន្លា ក្រុងសិរីសោភ័ណ អ្នករត់តាក់ស៊ី២នាក់បងថ្លៃប្អូនថ្លៃនេះ គឺបានគំរាមកំហែងយកប្រាក់ពីជនរងគ្រោះចំនួន ១០.០០០បាត រួចគេចខ្លួន។ បន្ទាប់មកជនរងគ្រោះបានមកប្តឹងនគរបាល ហើយនគរបាលបានធ្វើការស្រាវជ្រាវ ដែលជនសង្ស័យជាមុខសញ្ញាចាស់ដែលកម្លាំងនគរបាលកំពុងតែស្រាវជ្រាវផងនោះ ទើបនគរបាលឈានដល់ការចាប់ឃាត់ខ្លួនទាំង២នាក់ ឈ្មោះ លីវ តាំងហូរ និងឈ្មោះ ផល សីហា រួមទាំងដកហូតវត្ថុតាងរថយន្ត១គ្រឿង ម៉ាកកាមរី ពណ៌ស្ពៃជ្រក់។
តាមចម្លើយសារភាពរបស់ជនសង្ស័យទាំង២នាក់បងថ្លៃប្អូនថ្លៃ បាននិយាយថា ពួកខ្លួនពិតជាបានប្រព្រឹត្តដូចពាក្យចោទប្រកាន់របស់ជនរងគ្រោះឈ្មោះ ព្រំ ភ័ក្រ នោះមែន ។ ប្រាក់ចំនួន ១០.០០០បាត ដែលបានមក ខ្លួនបានប្រគល់ខ្លះឲ្យប្រពន្ធ ចាក់ហ្គាសអស់ ១.០០០បាត ឲ្យប្អូនថ្លៃឈ្មោះ តាំងហូរ ៥០០បាត សល់ប៉ុន្មានខ្លួនបានទិញថ្នាំញៀនមកជក់ជាមួយប្អូនថ្លៃរបស់គេ ។
លោកឧត្តមសេនីយ៍ត្រី អាត់ ខែម ស្នងការនគរបាលខេត្តបន្ទាយមានជ័យ បានបញ្ជាក់ថា ជននេះ គឺជាមុខសញ្ញាចាស់ធ្លាប់កំហែងយកលុយពីប្រជាពលរដ្ឋមកពីថៃជាច្រើនលើកមកហើយ ដែលកម្លាំងនគរបាលខេត្ត បានធ្វើការស្រាវជ្រាវយ៉ាងសកម្មទើបឈានដល់ការបង្ក្រាប ប៉ុន្តែពេលនេះគេអស់លក្ខណហើយ។ ជនសង្ស័យទាំង៣នាក់ ត្រូវបានកម្លាំងនគរបាលការិយាល័យជំនាញកណ្តាលនគរបាលព្រហ្មទណ្ឌបានរៀបចំសំណុំរឿងបញ្ជូនខ្លួនទៅសាលាដំបូងខេត្ត ដើម្បីចាត់ការតាមនីតិវិធីច្បាប់ ៕
