ឈ្មោះ Sid Ahmed Ghlam អាយុ២៤ឆ្នាំ ជានិស្សិតវិស្វករផ្នែកអេឡិចត្រូនិក ជនជាតិ Algerian ត្រូវបានចាប់ខ្លួននៅទីក្រុងប៉ារីស បន្ទាប់ពីបានទូរស័ព្ទហៅរថយន្តសង្គ្រោះបន្ទាន់មួយគ្រឿង ដោយគ្រោះថ្នាក់នេះត្រូវបានមើលឃើញថា ជនម្នាក់នេះបានបាញ់លើជើងខ្លួនឯងដោយចេតនា ។
ក្រោយពីភ្នាក់ងារសេវាសង្គ្រោះបន្ទាន់ដែលកំពុងព្យាបាលរបួសដោយសារគ្រាប់កាំភ្លើងនេះ បានប្ដឹងទៅប៉ូលីស ដោយក្នុងរថយន្តរបស់ Ghlam ត្រូវបានរកឃើញស្នាមឈាម ។ នៅក្នុងរថយន្តនោះមានប្រអប់អាវុធមួយ រួមមាន កាំភ្លើងខ្លី អាវក្រោះការពារគ្រាប់ និងកាំភ្លើងប្រភេទAK-47 ។ ជាមួយគ្នានេះដែរ ពួកគេបានរកឃើញ Laptop មួយគ្រឿង ទូរស័ព្ទដៃបីគ្រឿង ដែលប្រើដើម្បីទាក់ទងជនសមគំនិតម្នាក់នៅក្នុងប្រទេសស៊ីរី ដែលបានប្រាប់ឲ្យបុរសម្នាក់នេះវាយប្រហារលើព្រះវិហារមួយកន្លែង ។ អាវុធជាច្រើនក៏ត្រូវបានរកឃើញនៅកន្លែងស្នាក់នៅរបស់ Ghlam ព្រមទាំំងឯកសារមួយចំនួនដែលពាក់ព័ន្ធក្រុមអាល់កៃដា និងក្រុមឧទ្ទាម IS ។
កាលពីពេលថ្មីនេះ លោក Bernard Cazeneuve រដ្ឋមន្ត្រីក្រសួងមហាផ្ទៃបាំរាំង បានបញ្ជាក់ថា Ghlam ត្រូវបានគេស្គាល់ថាជាភ្នាក់ងារចារកម្មប៉ុនប៉ងចូលរួមប្រយុទ្ធជាមួយក្រុម Jihadists នៅប្រទេសស៊ីរី ៕
