ខេត្តពោធិ៍សាត់ៈ មានមនុស្សស្លាប់ពីរនាក់ ក្នុងករណីពីរផ្សេងគ្នា គឺម្នាក់ស្លាប់ដោយខ្យល់គរ និងម្នាក់ទៀតស្លាប់ ដោយធ្វើអត្តឃាតចងកសម្លាប់ខ្លួន ប្រភពព័ត៌មានពីលោក ឯម រុន អធិការនៃអធិការដ្ឋាននគរបាលស្រុកក្រគរ បានបញ្ជាក់ឲ្យដឹងថា ករណីមនុស្សស្លាប់ដោយខ្យល់គរ ជនរងគ្រោះមានឈ្មោះ កេន កុសល ភេទប្រុស អាយុ៤៤ឆ្នាំ មានទីលំនៅក្នុងភូមិទួលម្កាក់ ឃុំអន្លង់ត្នោត ស្រុកក្រគរ ខេត្តពោធិ៍សាត់ បានស្លាប់ក្រោយពេលបញ្ជូនទៅសង្គ្រោះ នៅមន្ទីរពេទ្យស្រុក មូលហេតុដោយសារខ្យល់គរ វេលាម៉ោង ០៩និង៣៥នាទីយប់ ថ្ងៃទី១២ ខែកុម្ភៈ ឆ្នាំ២០១៥ ។
ចំណែកករណី ចងកធ្វើអត្តឃាតវិញជនរងគ្រោះ ឈ្មោះ ចាន់ យី ភេទស្រី អាយុ២៤ឆ្នាំ មានទីលំនៅក្នុងភូមិអង្គុញខ្សាច់ល្អិត ឃុំអន្សារចំបក់ ស្រុកក្រគរ ខេត្តពោធិ៍សាត់ បានធ្វើអត្តឃាតចងកនៅដើមស្វាយក្បែរផ្ទះ ករណីនេះកើតឡើងនៅវេលាម៉ោង ១០និង១៥នាទីយប់ មូលហេតុផឹកស្រវឹង ត្រូវប្តីស្តីបន្ទោស តូចចិត្តខ្លួនឯង ។ លោកអធិការបានបន្តថា សពសាកជនរងគ្រោះទាំងពីរនាក់ ត្រូវសមត្ថកិច្ចប្រគល់ជូនក្រុមគ្រួសាររៀងៗខ្លួន ធ្វើបុណ្យតាមប្រពៃណី ៕
