នៅក្នុងអនុក្រឹត្យនោះ បានកំណត់ថា សម្រាប់បុគ្គលដែលមិនគោរពការវែកញែក វេចខ្ចប់សម្រាម បែងចែកសម្រាម ដាក់ទុកសម្រាមតាមដងផ្លូវមិនសមស្របតាមពេលវេលាដែលបានកំណត់ ការបោះចោលសម្រាមតាមទីសាធារណៈ ដងផ្លូវការដុតសម្រាមនៅទីប្រជុំជនសាធារណៈ មិនបានត្រឹមត្រូវ ម្ចាស់អ្នកគ្រប់គ្រងផ្សារ ទីតាំងអាជីវកម្ម ក្រុមហ៊ុនសហគ្រាសជាដើមដែលមិនរៀបចំមានធុងសម្រាមត្រឹមត្រូវ ការវេចខ្ចប់ដោយមានលាយជាមួយសំណល់រឹងឧស្សាហកម្ម ឬសំណល់រឹងគ្រោះថ្នាក់ នឹងត្រូវទទួលបានការផាកពិន័យជាប្រាក់ចាប់ពី ១ម៉ឺនរៀល ទៅ២០ម៉ឺនរៀលទៅតាមប្រភេទសម្រាម ។ ក្នុងករណីបុគ្គលបង់ប្រាក់ពិន័យមិនតាមពេលវេលាកំណត់ ការពន័យនឹងត្រូវបង់ពិន័យកើនចំនួនពី២ដង ទៅ៣ដង ហើយបើមិនបង់ក្នុងរយៈពេល៩០ថ្ងៃ អាជ្ញាធរនឹងរៀបចំសំណុំឯកសារប្តឹងទៅតុលាការ ។
នៅក្នុងពិធីផ្សព្វផ្សាយអនុក្រឹត្យស្តីពីការគ្រប់គ្រងសម្រាម និងសំណល់រឹងនៅទីប្រជុំ នៅទីស្តីការក្រសួងមហាផ្ទៃ នាព្រឹកថ្ងៃទី១៦ ខែវិច្ឆិកា ឆ្នាំ២០១៥ សម្តេចក្រឡាហោម ឧបនាយករដ្ឋមន្ត្រី ស ខេង មានប្រសាសន៍ថា បានបញ្ជាឲ្យអាជ្ញាធរមូលដ្ឋាននៅគ្រប់ក្រុងស្រុកខ័ណ្ឌ រាជធានីខេត្តទាំងអស់ត្រូវកំណត់គោលការណ៍ណែនាំរបស់ខ្លួនឲ្យសមស្របដាក់ជូនទៅប្រជាពលរដ្ឋ បណ្តាម្ចាស់អាជីវកម្ម និងសហគ្រាសនានានៅមូលដ្ឋាន សំដៅកំណត់ពីរបៀបគ្រប់គ្រងទុកដាក់ វេចខ្ចប់ វែកញែកសម្រាម និងសំណល់រឹង រាវ ឲ្យបានត្រឹមត្រូវ និងសម្របសម្រួលកិច្ចដំណើរការសេវាសំអាត ប្រមូលដឹកជញ្ជូន ទុកដាក់សម្រាម ឲ្យល្អប្រសើរ ។
នៅឆ្នាំ២០១៥នេះ ក្រសួងបរិស្ថាន រួមសហការជាមួយក្រសួងសេដ្ឋសេដ្ឋកិច្ច និងហិរញ្ញវត្ថុ និងក្រសួងមហាផ្ទៃ បានសម្រេចចិត្តបង្កើតកញ្ចប់ថវិកាសេវាអនាម័យបរិស្ថាន ទម្លាក់កញ្ចប់ថវិកាប្រមាណ៥ពាន់លានរៀលជូនទៅរដ្ឋបាលក្រុងស្រុកនៅទូទាំងប្រទេស សម្រាប់ឲ្យអាជ្ញាធរមូលដ្ឋានទាំងអស់នោះ អនុវត្តមុខងារ គ្រប់គ្រងសម្រាម សំណល់រឹង រាវនៅទីប្រជុំជន។
សម្តេចក្រឡាហោម ស ខេង បញ្ជាក់ថា សម្រាប់ការផ្លាស់ប្តូរឥរិយាបថរបស់រដ្ឋផ្ទេរទៅឲ្យអាជ្ញាធមូលដ្ឋានអនុវត្តផ្ទាល់នេះ ប្រសិនបើអនុវត្តបានជោគជ័យ រដ្ឋបាលថ្នាក់ជាតិ នឹងបង្កើនការផ្ទេរមុខងារ និងថវិកាថែមទៀតដើម្បីសម្រេចគោលដៅការគ្រប់គ្រង កាអភិវឌ្ឍន៍របស់ប្រទេសជាតិ ៕
