លោកវរសនីយ៍ទោ ឈន រិទ្ធិ អធិការនគរបាលក្រុងពោធិ៍សាត់បានប្រាប់ឲ្យដឹងថា ការបង្ក្រាបមុខសញ្ញាប្រើប្រាស់សារធាតុញៀននេះ សមត្ថកិច្ចនគរបាលក្រុង បានសហការជាមួយកម្លាំងការិយាល័យបង្ក្រាបគ្រឿងញៀនខេត្ត ដឹកនាំបញ្ជាដោយលោក ឡុង យាប ព្រះរាជអាជ្ញារងសាលាដំបូងខេត្តពោធិ៍សាត់។
មុខសញ្ញាដែលសមត្ថកិច្ចចាប់ឃាត់ខ្លួនទី១.ឈ្មោះ ម៉ៅ វីរៈ ភេទប្រុស អាយុ៣១ឆ្នាំ, ទី២.ឈ្មោះ ញ៉ែម សាមិត្ត ភេទស្រី អាយុ៣៤ឆ្នាំ ពីរនាក់នេះ ជាប្តីប្រពន្ធនិងគ្នា មានមុខរបរលក់បបរមាន់ពេលយប់ ស្នាក់នៅផ្ទះជួលបៃតង ស្ថិតក្នុងភូមិ-សង្កាត់ខាងលើ, ទី៣.ឈ្មោះ ឃុន ស្រីនិច ភេទស្រី អាយុ១៦ឆ្នាំ នៅភូមិពោធិតាកួយ សង្កាត់លលកស ក្រុងពោធិ៍សាត់, ទី៤.ឈ្មោះ ឈួន ជំនោ ភេទប្រុស អាយុ២០ឆ្នាំ រស់នៅភូមិពាលញែក១ សង្កាត់ផ្ទះព្រៃ ក្រុងពោធិ៍សាត់ មុខរបរជាងដែក, ទី៥.ឈ្មោះ សុខ ណា ហៅ ណយ ភេទស្រី អាយុ២៤ឆ្នាំ មុខរបរបម្រើការការ៉ាអូខេ នៅហាងស្លាមាស ស្នាក់នៅផ្ទះជួលបៃតង, ទី៦.ឈ្មោះ ជា សុវណ្ណពិសិដ្ឋ ភេទប្រុស អាយុ២២ឆ្នាំ នៅភូមិប៉បិត ឃុំអន្លង់ត្នោត ស្រុកក្រគរ ខេត្តពោធិ៍សាត់ មុខរបររត់ម៉ូតូឌុប និងទី៧.ឈ្មោះ ទិត មុន្នីរដ្ឋា ហៅ ឆ្នុក ភេទប្រុស អាយុ៣៥ឆ្នាំ រស់នៅភូមិពាលញែក១ សង្កាត់ផ្ទះព្រៃ ក្រុងពោធិ៍សាត់ ជាមន្ត្រីកងរាជអាវុធហត្ថ។
លោកវរសេនីយ៍ទោ ឈន រិទ្ធិ បានបន្តថា ក្រោយពេលឃាត់ខ្លួនសមត្ថកិច្ចជំនាញបានធ្វើតេស្តទឹកនោមឃើញថា មានសារធាតុញៀនក្នុងខ្លួនមុខសញ្ញា ៥នាក់ និង២នាក់ទៀតគ្មានសារធាតុញៀន (ពីរអ្នកប្តីប្រពន្ធ) សមត្ថកិច្ចអប់រំឲ្យត្រឡប់ទៅលំនៅដ្ឋានវិញ។ ចំពោះអ្នកមានសារធាតុញៀនទាំង៥នាក់ និងវត្ថុតាងដែលសមត្ថកិច្ចដកហូតបានមាន ម៉ូតូ២គ្រឿង ទូរស័ព្ទដៃ១០គ្រឿង IPad ១គ្រឿង វិទ្យុទាក់ទង២គ្រឿង កាបូបមួយ ដាវសាំម៉ូរ៉ៃមួយដើម និងសម្ភារសម្រាប់មុខសញ្ញាជក់គ្រឿងញៀនមួយចំនួនទៀត ត្រូវបានសមត្ថកិច្ចកសាងសំណុំរឿង បញ្ជូនទៅសាលាដំបូងដើម្បីចាត់ការតាមច្បាប់ ៕
